當年今日

一周兩件:商廈魚翅級華大粉絲價

蘋果日報 2005/01/16 00:00


華大地產(201)上年10月31日見報,翌日股價7仙,新造0.123元。當冇提過,現價照秤,有資格翻一番。
華大投資物業,重磅嘅包括山頂加列山道洋房及中環順豪商業大廈。03年度(12月止),香港投資物業估值4.19億元,上年尾,順豪商業大廈標售,報載市值逾4億元,估計值4.5億元;至於華大山頂洋房(總樓面9500平方呎),照市價每方呎2.5萬元秤,資產值2.4億元。呢兩幢物業最新資產值講緊6.7億元,增值2.7億元。
好戲在後頭。華大03年撈底,以2.3億元筍價購入英皇道633號地皮,家陣連地基、融資及地價成本3.5億元。又係上年11月,地皮獲兩買家以14億元收購,照計數,呢塊地資產增值高達10.5億元。呢轉牛市升浪,暫時為華大資產大大增值13.2億元,重秤後每股資產值0.44元,現價折讓超過7成。華大商廈係魚翅級數,但重係粉絲(股)價。

康師傅短線炒一轉
康師傅(322)上周五在跌市中逆流升一格。又講兩點,康師傅04年第3季(09月止)純利1967萬美元,同比增長13%,亦係康師傅頭3個季度中,本業純利最醒神一季。除咗收入增加,另一主因係原料價格調整,並且係03年以來首見。即係話,若然原料價調整唔係小循環,而係大趨勢,康師傅呢家重量級食品企業,或者會獲基金重新品評過,中長線有計。
第二,食品相關股份中,中國糧油(506)已經快馬加鞭,康師傅上周四先啱啱突破近一個月短期下降軌,睇勢做人,似乎短線嚟一轉都重得。
錢雋