當年今日
關於我們

求驗客手記︰強國球迷要拉隊入場
香港fans現身喇!

蘋果日報 2015/04/22 00:00


早排亞洲足協就為世盃外圍賽亞洲區次圈抽咗籤,將中國同香港抽埋一齊喺C組,而香港主場對中國嘅大戰就會喺今年11月17號舉行。雖然仲有成半年先踢,但中國球迷打算到時用人海策略,反客為主,希望坐爆香港主場,而香港球迷亦不甘示弱,喺網上呼籲多啲人入場。
empty
龍之隊粉絲:要坐爆港主場
抽完籤後,《重慶晨報》出咗篇報道,話中國四場作客比賽中,內地球迷嚟香港睇波嘅開支就最低同最方便,仲訪問咗龍之隊球迷會會長簡滿根,佢話:「呢場比賽我哋嘅目標係坐爆香港嘅主場看台!」見到內地球迷想「佔領球場」,有啲香港球迷都反應好激,而港隊忠實擁躉Jordan就話:「睇吓落實邊度踢,先擔心啲門票問題。唯一擔心中港關係,將唔少政治元素帶入球場。」足總都話,下個月先決定喺邊個場踢,考慮到可容納四萬觀眾嘅大球場將重修,加上有可能同欖球比賽撞期,所以中港大戰未必會喺大球場踢。如果移師旺角場,座位更得番六千幾個位,到時中港大戰肯定會掀起搶飛潮。
另外,港隊噚朝喺晒草灣球場開操兼友賽黃大仙,但因為南華同傑志今晚要踢聯賽盃決賽,所以兩隊冇派球員出席。只有18人嘅港隊,最終仍憑陳文輝、鄭璟昊同周綽豐嘅入球,以3:2險勝半力出戰嘅黃大仙。啱啱攞到特區護照嘅基藍馬,被安排踢下半場,不過演出有唔少甩漏,佢賽後話因為第一次着港隊呢件波衫,雖然只係友賽,但都好緊張。港隊教練金判坤睇完呢位東方中堅嘅演出後,都話佢要多啲時間適應港隊踢法喎。
對於俾足總競賽主管話冇協調就公開備戰計劃,金帥解畫話稍後會出席港超球會會議,到時會簡介今次備戰世盃外嘅計劃,希望可以同各方取得共識。世盃外C組同中國、卡塔爾、馬爾代夫及不丹同組嘅香港,首戰會喺6月11日主場鬥不丹。
empty
empty
港隊新丁基藍馬(左)噚日友賽黃大仙時,因心情緊張影響演出。曾雁平攝
識睇,一定係睇足英台【英波Live】:
http://soccer.appledaily.com
http://bit.ly/engballlive