郭能一向同蔡約翰好少合作，平均每季只得十次左右， 兩人歷來只攜手贏過一匹「安友」。

周三（5日）谷草九場夜賽，第九場二班1800米隻「紅運戰士」上場初次升二班，出戰谷草1650米，喺潘頓胯下捧成1.7倍大熱，結果搏失只得季軍後，今場換上郭能，亦成為今季騎練首度合作；而潘頓就會騎同場賀賢隻「勝利仔」。

潘頓嘅眼光準唔準，真係要跑過先知，但莫雷拉即將成為蔡廐主帥前，郭能獲倉主睇中，策騎呢匹有近績支持嘅賽駒，而且匹馬目前喺百萬挑戰盃領先，佢都話非常珍惜今次合作，「紅運戰士」亦有運抽到黃金1檔。

不過，佢話唯一唔明朗因素就係「紅運戰士」跑完上仗後返上從化，由駐從化騎馬人黎爾令試1200米閘。

「紅運戰士」全程居後大敗19.75個馬位，由於只係睇片，所以郭能亦唔肯定隻馬係刻意隱藏實力抑或狀態有所問題，要等到今晚（5日）賽前同蔡約翰傾戰略時先至知道。