當年今日
關於我們

求驗客手記:底褲開窿 車仔醒神有股惑 - 求驗客

蘋果日報 2010/08/23 00:00


今季英超衞冕嘅車路士,喺今夏熱身賽表現麻麻,但開咗「咧」之後就有脫胎換骨嘅表現;喺上周六英超尾場,慨贈韋根6隻蛋,連同開鑼戰以6:0勝西布朗,兩場已經有「一打」入球。車仔球員咁勁,可能同佢哋感受到「八月十五危機」有關!
更衣室有神秘怪客
話說近呢一年,車仔更衣室出現神秘怪客,會將球員嘅底褲剪爛,專喺兩片patpat位開窿,等球員着上底橫後,八月十五就會露出嚟。車仔球員由於認為呢個係其中一名隊友嘅所為,開頭都覺得幾好玩;但由於事件持續,佢哋開始覺得好困擾,其中中場林柏特仲話:「我心目中已經大概知道係邊個做,只要搜集更多證據,我就會揪出『兇手』!」
可能車仔球員就係因為底褲開窿,驚喺比賽時同對手爭波俾人拉衫拉褲而露股出醜;所以開「咧」之後不知踢得幾醒神,逢人過人,仲腳腳七注,所以先至兩連勝兼入球停不了。
連車仔領隊安察洛堤賽後亦話:「球隊表現好好,好似打機咁。」即係擺明「屈機」啦!
不過,前日俾車仔狂數嘅韋根就慘喇,呢支西北球隊連同開鑼戰爆冷以0:4不敵黑池,兩場波已經失咗10球,而且零入球。喺前日迎戰車仔時,可能係主場球迷對韋根太失望,可以容納2萬5千幾人嘅DW球場(未冠名之前叫JJB球場),竟然只得萬四人捧場,場面都幾寥落。
此外,由於韋根連續兩場大敗,領隊馬天尼斯嘅帥位亦岌岌可危,佢仲成為今季首名離隊嘅英超領隊大熱,得3.5倍。雖然呢名西班牙籍教頭,賽後口口聲聲話球隊現時冇危機,亦對自己可以繼續執教好有信心;不過球隊今季表現唔好係事實,後防更形同虛設,令我求大俠有啲掛住已經轉會新特蘭嘅中堅巴布爾。
既然球隊表現咁唔掂,唔知馬天尼斯會唔會效法車仔更衣室怪客,靜靜雞剪爛球員底褲,等佢哋有反彈嘅演出呢?