當年今日
關於我們

【倒數3戰】退役堅去多蒙跟操 保特代Auba不是夢?

蘋果日報 2017/06/27 09:13

德甲多蒙特世錦賽飛人田徑保特迪加斯

想睇牙買加飛人保特嘅狂奔英姿,把握最後機會呀!30歲嘅保特周一喺捷克每斯特拉法舉行記招,迎接周三舉行嘅Golden Spike田徑巡迴賽,連同下月舉行嘅鑽石田徑聯賽摩納哥站同8月嘅倫敦世錦賽,好有可能係佢最後3項賽事。不過,保特周一就似乎有意留後路,只肯確認今季將會係佢最後一個田徑賽季。面對加拿大新星迪加斯來勢洶洶,加上自己今年只曾喺牙買加跑出10秒03「慢速」封王,令人擔心佢會以遺憾告別,但保特依然自信十足:「我係目前世上最快飛人,所以我會話自己有能力駕馭迪加斯。每次我聽到順風造出嘅時間,老友都會問『點解你冇咁好彩?』我哋經常逆風而戰,只能夠話我冇咁好運。」
談及退役後去向,呢位奧運9金得主表示自己唔會完全離開田徑場,會留喺牙買加培育新血,但佢堅稱之前提及跟隨德甲球會多蒙特試腳一星期嘅消息「珍珠都冇咁真」:「我絕對會去多蒙特跟操,呢件事仍然喺預期之中,亦係我決定未來職業嘅時刻。如果我訓練得好,就可以話一試無妨,否則就悄悄離開球壇,但我會睇吓有咩發生。」既然奧巴美揚盛傳離開多蒙特,不如諗諗跑得更快嘅保特?
empty
保特獲賽會頒發號碼布。