香港買樓做港元按揭，除非當時市場覺得港元會脫鈎，如果唔係，最影響按揭息率，就一定係美元美債息率。如美元供過於求，美債息率就會不斷向下，香港按揭利率，亦會鐵索連舟咁跌。

由1980年起，美國聯儲局成功將通脹殺低，美債息率一浪低於一浪。直到舊年破晒記錄咁，連美國政府借十年錢嘅利息，都跌穿1.4厘。而當時，就有好多報導同分析，話如果學日本、德國等，十年債息跌穿零厘會點。

不過，11月初特朗普一當選，債息就開始狂飆，最高見2.6厘，現報大約2.4厘。升幅，去到挑戰由1980年至今嘅下降軌。舊債王Gross，就話睇實2.6厘。穿，就債市進入超熊市，債息越升越高。而新債王（兼孫柏文偶像）Gundlach，則話睇實3厘呢嗰水平。而如果升穿，香港按揭息率，都會爆上。

咁有乜會令佢郁？其實，個個依家都睇實特朗普同美國。如果特朗普減稅、加開支、削條例方案被國會接納通過，美債息口將會大單邊咁爆。而最大變數，將會美國是否推全國性銷售稅。如推，入口貨即貴成半，出口有退稅，而美元會爆升，債市極波動。

如果你係個借咗好多錢買樓嘅人，除咗睇美國會會否撳實特朗普外，可以安慰嘅，就係啲「散戶」（當然，炒得美債嘅「散戶」，個個閒閒地都億億聲）破記錄咁拋空美債博債息升。歷史以來，「散戶」喺咩市場單邊落注，就係調轉頭造倉之時。不過「散戶」唔係次次錯，2016年就係「散戶」連續贏之年。

孫柏文

掌握財經生活資訊，即Like「蘋果ATM」fb專頁啦！
http://fb.com/appledailyatm