星期三晚(6日)跑馬地揭幕戰，莫雷拉坐騎大部份屬邊線份子，全晚較睇好第五場「獵狐者」。

「獵狐者」上季尾健康穩定後演出準繩，連續兩場谷草1200米都跑獲亞軍，早前嘉年華大閘亦試得出色，全程拍住「家品皇者」有餘未盡，「家品皇者」已輕鬆贏馬，今次「獵狐者」排3檔理想，上季呂健威同莫雷拉合作10次共取得4冠3亞1季好成績，有能力反先「紅星」。

今季葉楚航大部份參戰馬都有大閘功夫，但未見跑得特別好，「紅星」無大閘但埋門交由羅理雅過檔，馬匹仍保持壯身有力，仍是選擇之內。同場「敬無極」最近泥閘入直路後未能望空，去到終點前移出少少攞位，即交出良好反應，今次1檔希望可跟前競跑，不要太過被動。

高伯新沙田開鑼戰食尾糊，跑馬地夜賽揭幕戰想食過翻尋味！尾場(第八場)二班1200米派出「傑飛」，上季曾於同程劣檔後上贏「順勢寶」姿態誇張，今次重戴眼罩，過往高伯新馬匹若配備變動，不時有好表現，今次帥權落喺潘頓手上，今個暑假後潘頓身形保持得好好，戰意十足。

「傑飛」對手方面，「一道」上季尾同程連贏兩場，贏馬時間比標準時間快，田泰安夾慣夾熟，試閘按實墜手有力，呂健威全晚強陣出擊，此駒可跨季三捷。「幸運美金」初跑谷草，但同父馬跑谷草成績可以，加上容天鵬之馬試閘少有一放到底，宜重視。