如果回到三國，Cammi可能係最強嘅武器…刀削臉……

冇花冇假，自N年前流出啜爆舊愛陳冠希嘅慾照，Cammi(謝芷蕙)人氣搶上位，最初被指似女版時裝設計師Nel Nel（張學潤）兼貌似鬥牛㹴，其後女大再十八變變變，無限進化，見Cammi放上網嘅相，雙眼越變越大，下顎就如倒三角，越變越尖，眼、鼻及嘴完全唔同，網上啲相仲拉長對腳，拉到變形，呢啲似乎要歸功畀「美圖」!!!

近來好少出席活動嘅Cammi今日去銅鑼灣出席美容院剪綵現真身，見佢除咗個下巴尖到可以「插死人」之外，其實真面目都冇咩點變，o依家有個富二代男友照顧，又主力搞時裝生意，樣樣嘢都要親力親為，有時仲要做模特兒著影衫，對於好多網民笑佢啲相PS過度，佢就話：「我執相主要係較色，同埋上鏡肥啲想執瘦少少。」

除咗俾人話過度PS外，又話你個樣年年「進化」，佢稱：「女大18變呀!朋友話我係骨膠原流失，所以塊面越嚟越尖，我發誓冇整過容，我唔介意身邊嘅朋友整，但我唔會。」原來面尖係關骨膠原事，真係長知識啦!

之但係講開又講骨膠原流失，加埋地心吸力唔係面部皮膚鬆弛，塊面會變成上尖下闊，而佢塊面係上闊下尖噃!唔通Cammi可以拒地心吸力!?