【李八方online】盧俊宇砌低「何已完」 聖誕再組團報《榮光》佳音
蘋果日報 2019/12/05 17:24
何君堯李八方ONLINE盧俊宇
盧俊宇話，目前只係籌備階段，暫時未知幾多人參加，而各大商場、中環遮打道或者銅鑼灣時代廣場，都會係《榮光》合唱團考慮演唱嘅地點之一。李家皓攝
「又到聖誕、又到聖誕」，踏入12月，各區開始有節日氣氛，但今個聖誕對香港人嚟講同過去有好大分別，漫長嘅反修例抗爭仍然持續，即使喺節日裏面，大家仍然諗住點為運動出一分力，喺屯門樂翠區擊敗何君堯嘅民主黨準區議員盧俊宇計劃組織《願榮光歸香港》報佳音合唱團，喺聖誕節繼續「和理sing」。
盧俊宇同八方講，今個聖誕相信每個香港人都有唔同嘅心情，而對香港人嚟講最好嘅佳音唔係傳統聖誕歌，而係代表抗爭嘅《願榮光歸香港》。佢希望可以喺聖誕節，將「榮光」嘅佳音帶俾所有市民，而自己又喺音樂方面有興趣同能力，於是組織合唱團，喺唔同地區、商場高唱《榮光》，分享節日喜悅。
盧俊宇又話，目前只係籌備階段，暫時未知幾多人參加，而各大商場、中環遮打道或者銅鑼灣時代廣場，都會係《榮光》合唱團考慮演唱嘅地點之一。活動歡迎小朋友同長者參加，強調合唱團係「和理非」，唔擔心出現暴力或者安全問題。聽日（6日）晚上9點仲會喺元朗形點一期（西鐵站K出口）有第一次練習。