嶺南大學唔少師生同校友近排都憂心忡忡，因為嶺大嘅貓王「小虎」病重。有校友話，已經14、5歲嘅小虎身體越來越虛弱，仲出現腎衰竭，比以前瘦咗好多。但嶺大發言人引述校長陳玉樹話，佢暫時都好放心，因為小虎寄居喺嶺大一個前職員嘅屋企休養，希望佢可以快啲康復，重返校園同嶺大師生一齊生活。

腎病要日日打針

每日喺校園負責餵貓嘅嶺大校董吳桂華話，初時傳出小虎可能患上貓愛滋，後來證實唔係，但就腎有事，仲要日日打針，身體唔係幾好。至於小虎幾時先可以重返校園，佢話相信要等佢病情穩定啲先再算。
吳桂華話，嶺大全校大概有百幾隻貓，但小虎同一般貓好唔同，佢除咗完全唔驚人外，仲係全校唯一一隻會搭嘅貓，有時又會走入教員室或者課室「聽書」取暖，住喺北宿嘅同學都好錫佢，整咗間菠蘿包形嘅貓屋畀佢，家仲等緊佢返屋企。
小虎咁可愛咁特別，當然多人錫，兩年前幫佢做絕育手術，嶺大特別要求愛協唔好剪佢對耳，因為全校人都錫佢，唔想佢隻耳仔冇咗一忽。