【冰說聰明】聯儲減息 助內房破位(青冰)
青冰冰說聰明
侵侵今星期出tweet發炮,話聯儲局反應太慢喇,本以為佢要鬧多兩星期,鬧到聯儲局會議,點知鮑威爾就出其不意,突然減息50點子,令市場震動,股市首個反應是升,但最後越諗越驚,周二晚道指倒跌785點收市。
市場之所以咁驚,主因係非議息期出手,屬不尋常,上次係08年1月及10月,再之前係07年8月;01年有3次,分別係1月、4月及9月;98年10月亦有一次。07、08年那三次是同一事件,首先是見到次按出問題,要開始救,10月那次就是雷曼爆煲後一個月;01年1月及4月,是因為科網股在00年喪炒爆煲,拖累經濟進入衰退,9月那次便是911事件;而98年就是亞洲金融風暴。
幾次在非會議期出手,都係超級大鑊嘢,所以今次減息後,市場即時的感覺係,聯儲局仲悲觀過我喎,所以掟貨係本能反應。今次減息之快,大家都唔收貨,就是釋出了負面訊號,而鮑威爾都承認,減息幫唔到病毒擴散,亦解決唔到供應鏈問題,戰友可能會問,減嚟做乜呢?但如果戰友回帶睇返過往的危機,聯儲局都是被批評救得太慢,事後mode講應該在危機初段時出手嘛,影響會細好多,你睇,市場係唔係好難服侍呢,早又鬧遲又鬧。
當市場信心漸失,流動性趨緊時才出手,粒子彈就要更大,才可達到相同的目的,更有機會返魂乏術,情況有如澳門極速封關,香港就……都費事講了,所以青冰都傾向支持聯儲局嘅。
內地放水救經濟似乎事在必行,最不利的影響,就是人仔會轉弱,孭住大量美元債的內房就大鑊了,但美國減息令美元轉弱,人仔匯價亦明顯轉強,間接助了內地一把,這也解釋了為何昨天內房強勢破位,如要揀股,揀啲批咗股嘅會少一重風險,咁融創(1918)及世茂(813)便成為最佳選擇喇。
青冰
http://www.fb.com/chingbing888
-----------------------
屬於香港人的移民攻略
立即登入
【全球樓行】 Dream House零距離