32歲嘅葉翠翠自從同黃有龍(現為趙薇老公)傳出緋聞之後，就突然富貴，曾經一擲三千萬買入兩個豪宅單位，之後翠翠被拍到有來往嘅男士都非富則貴，舊年9月就同結咗婚嘅會計師樓合夥人食晚飯，今年2月就被影到同揸保時捷嘅「波子男」闊少約會，今年8月又同地產高層酒店約會，其後翠翠澄清只係同朋友飲嘢。

咁多富貴男伴車輪轉，但最後跑出嘅原來係波子男。前日下午3點，記者發現波子男同翠翠駕保時捷喺銅鑼灣利園附近兜圈，相信佢係喺街邊搵車位，最後竟然將架車停咗喺雙黃線上，波子男仲好有風度咁落車幫翠翠開車門。翠翠落車時好警覺咁左望右望，之後兩個就入咗潮牌BathingApe快行一輪，但冇收穫，之後就去咗圓方繼續拍拖。

由於商場人多，兩個人行嘅時候一直保持距離，至搭扶手電梯嘅時候，兩人先至有機會面對面，翠翠施展眼波望實男方。之後波子男負責買戲飛睇戲，翠翠就去睇書，然後一齊入場睇戲。

睇完戲，兩個就喺商場食飯，去到9點幾，兩個人先至去停車場攞車。可能見停車場冇乜人，兩個人開始有講有笑，之後波子男車咗翠翠去到佢碧瑤灣嘅寓所，到凌晨都未見翠翠離開。