特首林鄭月娥上場就快一年，喺呢個時候佢接受咗《紫荊》雜誌嘅專訪，八方滿心期待，以為林鄭有重要宣告，點知原來係左一句按習主席要求、右一句喺習主席關懷下。

無辦法啦，今期《紫荊》要慶祝兩個一週年，講第二個先，就係大家都知嘅林鄭上任一週年，第一個之唔知國家主席習近平視察香港一週年咯。難怪林鄭嘅訪問都習主席乜乜乜啦。

林鄭喺專訪形容，呢一年嚟感受最深就係「中央對香港的全力支持，包括習主席視察期間的重要講話」，果然政治正確，仲話佢作為特首有堅定信念去「按著主席的要求，全面準備貫徹落實一國兩制」，而一國兩制係必須尊重一個國家、自覺維護國家主權、安全同發展利益嘅一國兩制。佢亦提到呢一年嚟，香港發咗一啲有爭議嘅事，「特區政府對於任何鼓吹港獨的言論，立場都是堅定的，是堅決反對的」。

呢個忠係未表完嘅，仲有林鄭話喺習主席關懷下，內地出咗便利港人措施，以及習主席親自關懷香港創科發展令佢感受最深。不過佢都有讚吓自己嘅團隊嘅，佢話好欣慰呢屆政府有團隊精神，可以積極地制訂唔同政策改善市民生活。

最後再嚟多次，佢話過去一年港府按住習主席要求展現團隊精神、積極作為，未來會「志不求易、事不避難」咁推動香港發展。