韓國男星金鐘國憑綜藝節目《RunningMan》（RM）喺內地大受歡迎，早前更宣佈會演出內地央視嘅最新中韓明星真人騷節目《叮咯隆咚嗆》，節目邀請咗兩地紅星親自體會京劇、越劇等戲曲表演形式，旨在促進文化交流。

近日，金鐘國現身浙江紹興一間學校進行拍攝，即被粉絲包圍集郵。而《叮咯隆咚嗆》請來當紅韓星拍攝嘅宣傳片亦已曝光，當中包括劉在石、李光洙同少女時代等。

至於噚日播出嘅新一集《RM》，金鐘國等幾位男主持為咗阻止人類滅亡，齊齊反串變身做最後嘅女性鬥靚，造型笑爆嘴。而擔任嘉賓嘅張東民仲懶理Gary在場，將頭靠向佢嘅「周一情侶」宋智孝度，冧到宋智孝甜笑。