民以食為天，去邊度玩都先check咗嗰度有冇好嘢食先。輕井沢像一個小鎮，鎮內有一條食街，就在新幹線車站旁邊，由大約十間食肆組成，分別有迴轉壽司、燒牛肉店、燒鳥（雞）店、燒鰻魚店、中華料理、奄列蛋店、拉麵店、餃子店與西式喫茶館，非常有默契，主菜都不會重叠，店主們揀選最店自慢（自豪）的食物款客，客人有選擇，商號亦不用為爭客頂爛市，保持高度尊嚴。

從車站步行往酒店途中經過食街，大約下午五時，各店內高朋滿座，一心諗住待安置好行李後立即回來大擦一餐，怎知七點鐘左右，八成食肆已關門，真箇是小鎮風情，日出而作，日入而息。看見燒牛肉店正準備關門，一個箭步撲上以單字日語加豐富身體語言，懇求老闆做埋我哋單生意，七嘴八舌擾攘一輪，終於有飯食。憑漢字點菜，總之見到牛肉（頂級）就點，雪花牛扒放在鐵板上輕輕一烤，肉香四溢，放在口中輕輕用牙齒一咬，固體牛化成一口油，嫩得可怕，眾人怪叫一聲，不斷吃不斷加碼，老闆看見我們這班饞嘴鬼的食相也不禁笑得眼睛瞇成一線。因為禁運問題，久矣在香港嚐不到日本牛肉，久別重逢，簡直是報仇咁報，老闆介紹來一客Sukiyaki，薄切雪花牛肉加蔬菜鋪在洗面盆大小的鐵盤，煮熟後自行加醬油及湯，吃前先蘸一蘸碗中的新鮮蛋汁，甚麼勞什子禽流感暫時拋到九霄雲外，滿嘴是肉，頭不停感動地擰嚟擰去，有酒有肉有朋友，埋單每人港幣三百五十元，飲飽食醉，一看手錶才九時，浸溫泉去也！