譚詠麟(阿倫)、許冠傑(Sam)噚晚喺紅館舉行一連十一場「阿Sam & 阿Tam HAPPY TOGETHER演唱會PART II」，兩位加埋超過百幾歲嘅歌壇殿堂級歌手，放盡力去唱，唱足三個鐘，毫不留力，而且大唱經典金曲之類，仲不停搞笑搞好氣氛，阿倫話：「去年我哋開騷遇流感，衛生署叫我哋唔好有咁親密嘅接觸，今年未公佈前，我哋有咩可以做?」Sam接住話：「梗係同大家攬攬錫錫，嚟個全接觸啦！」阿倫又問：「咁山頂嘅朋友點算?」Sam再話：「畀飛吻佢哋啦！」兩個即大派飛吻，又落台同觀眾握手，當然唔少得攬攬錫錫，Sam好happy咁同觀眾咀嘴。

演唱期間亦有個小插曲，佢哋企喺升降台，發覺升降台無郁，Sam好醒明同阿倫講：「我哋行樓梯，唔記得降我哋落去。」之後就各自Solo，Sam唱幾首追女仔歌，阿倫就唱Rock版歌。

當然唔少得Sam兩位公子懷欣(Ryan)同懷谷，三父子合唱，之後再加入阿倫齊齊Jam歌，現場氣氛高漲。唱完歌後，阿倫笑住對Ryan講：「今年中文好好多喎！上次字幕機譯音啲字我都睇唔明，今次真係係中文字幕。」Ryan就正經回答：「我用咗好多時間做好多功課記晒啲歌詞。」Sam反應好快咁窒阿倫：「歌詞係播畀你睇，為你而設。」

臨近尾聲時，Sam話有首香港人嘅校歌，個個都識唱，跟住現場就湊起阿倫首中一首名曲《愛在深秋》，Sam繼續話：「八、九十年代有好多歌手，佢哋嘅歌令到亞洲人認識，樂隊亦影響好多華人，我哋想藉住呢個機會向已故藝人作致敬。」接住唱出羅文嘅《幾許風雨》、Beyond嘅《光輝歲月》，Sam又話：「我加入歌壇半個世紀，好珍惜同身邊呢個美男子一齊演出。」阿倫亦向Sam笠高帽：「其實喺台上同阿Sam唱歌，一直係我夢寐以求嘅事，練歌時我已開始珍惜呢個機會。」

Encore前，阿倫話自己喺屋村長大：「好多香港人同我哋一樣，見證香港由一個藉藉無名嘅漁港，去到六、七十年代，大家奮鬥成為一個國際知名嘅大都會，Sam接話：「希望大家可以珍惜呢個福地、珍惜眼前人，為香港各行各業，繼續不屈不撓精神，happy together。」

精選娛聞，喺晒《娛果》
http://fb.com/appledailyent