大市繼續反彈，直至昨日，以期指高位18746計，大市由月初最低位已反彈超過2600點，即逾16%，反彈的幅度與速度確實驚人，當10月頭兩個交易日大市一跌再跌，自己都一度懷疑難道狡猾的市場先生真係咁順攤，當人人都話10月股災時就應大家所想？
自己途中也有減持，幸好見底日見到大市剛回調至08至10年升浪的0.618倍，又只見指數跌而個股固若金湯，補回大部份持倉，才不致錯失這趟急彈。當然，尚有大半個月，後市去向如何都未知，唔可以咁快下定論，不過，如果被洗腦式地認為本月必是股災月，相信止蝕完都幾難有勇氣追番，無論如何，相反理論此刻又再顯示出其作用。
現時投資者普遍的心態都係傾向趁反彈減持，或者趁高造淡，只要看一看熊證數目的增加便可見一斑，正如之前所言，當出現如此接近一面倒的心態，大戶好少放過，雖然由底部回升頗多，中途出現回調都唔出奇，不過以坊間的心態，繼續反彈的機會仍然較高。