謝霆鋒噚晚喺北京出席完好友吳君如執導嘅賀歲電影《妖鈴鈴》首映，今日獨自回港，大約兩點霆鋒現身機場，着住運動裝戴上cap帽同黑超出閘，霆鋒心情大靚，主動同大家講聖誕快樂！問霆鋒點樣慶祝聖誕？有冇參加聖誕派對？佢話：「我都唔party嘅，唔知乜嘢係party，我日日都係節日。」問佢有冇計劃除夕點過？佢就透露會喺工作中度過，佢仲笑住反問記者：「除夕乜嘢嚟㗎？我年年都係咁過。」再問到同女友王菲點樣慶祝聖誕？霆鋒就話：「日日都係節日。」咁有冇喺聖誕見吓兩個囝囝？送咗乜嘢禮物畀佢哋？霆鋒就話：「唔話你知。」問到新一年嘅願望，霆鋒諗一諗話：「同過去廿幾年一樣，所有嘢不斷進步。」

至於提到有報道指爸爸四哥同女友甩拖 (新聞連結： http://bit.ly/2Ca9hhJ )，霆鋒就表示唔知情，佢話：「我唔知，聖誕節冇聯絡，返嚟一定見。」問霆鋒有冇關心老竇感情事？佢就話：「唔使嘞，佢大個仔。」

而講到最近節目《鋒味》中要素食主義女廚師Daphne Cheng烹調肉類，惹嚟爭議(新聞連結： http://bit.ly/2l5veqK )，霆鋒就話：「唔使回應嘞，節目度已經講晒，我係支持任何習慣嘅，比賽係好難，我哋去到世界各地，個規矩唔係我定，有標榜係比賽。比賽未完，啱啱喺挪威比完第11場，仲差明年7號喺北京一場，就會有最後3名參賽者比賽，最後一位會攞到180萬，o依家北京搭建緊北京嘅實驗室。」

另外，提到JM去芬蘭時差啲唔見晒啲行李，幸好失而復得，霆鋒就話：「我之前有去過挪威，冇試過唔見。」

更多娛聞，喺晒《娛果》
http://fb.com/appledailyent