一隻俾人亂丟嘅路姆西公仔，掀起全城搶購熱潮，唔少人都對隻狼嘅粗口譯音，暗暗偷笑。點知喺呢個時候，有Tree根之稱嘅民建聯鍾樹根，竟然以一句疑似粗口「肯能定有問題」批評狼英嘅管治，莫非佢都想同路姆西，爭奪下市民畀嘅like？
話說now新聞台前日嘅直播時事節目《大鳴大放》，身為嘉賓嘅Tree根被主持李鵬飛問到特區管治問題時，講咗句「你話完全話冇問題就唔係嘅，肯能定係有問題」，結果網民cap片瘋傳，話佢「肯能定」係爆粗，但就唔可以「肯能定」佢加入反狼陣營喎。

指網民改圖蓄意嫁禍或追究

嘩，乜Tree根對狼英咁多怨氣，要用粗口「提點」先安心？Tree根堅持冇爆粗，仲話得知網民有此指控後特登翻睇錄影片段：「都係重複咗個『肯』字啫……漏咗嘴啫，咁都屈我講粗口？佢哋鍾意屈就屈，上次港台60億建大樓單嘢（鍾被指藉港台建大樓諷王維基身家少），大家都屈我啦。」
主持人飛哥就笑稱，當場唔覺亦唔信Tree根爆粗，「最多一時口快快漏口啫」，仲話Tree根同快必嘅討論好有氣氛，歡迎大家重溫㖭。
Tree根噚日傍晚竟然發新聞稿，話對網上有人修改佢條片話佢講粗口，係蓄意嫁禍……遺憾之餘仲會保留追究權利，仲要求now播片時唔好「嘟」咗重複嘅「肯」字。查實點解釋都假，至緊要狼英唔覺得Tree根人身攻擊，否則又要依法追究、要重案組追查、要立法會主席曾鈺成交報告嘅話，民建聯都未必保得住Tree根咯。大家不妨睇片作個「肯定」。

mailto:[email protected]

杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24