當年今日
關於我們

西九核突燒乳豬vs可愛鴨鴨 袁老總都頂唔順!

蘋果日報 2013/04/24 06:00

香港巨型鴨仔

可愛鴨鴨吸引全港人視線,不過...遙望西九「文化長廊」,不得了,都有吹氣公仔呀,不過係 吹氣乳豬同吹氣大便

香港資深樂評人袁智聰睇完網上啲相,都頂唔順,喺微博度上新po話:「這邊廂巨型鴨仔到訪香港,得意又可愛,還可以活生生地游水暢泳,下月會正式在維多利亞港亮相; 另一邊廂,香港特區卻做了隻好肉酸好死的巨型燒乳豬放在西九龍 我懷疑後者是用來向上星期逝世的英國傳奇性視覺藝術家StormThorgerson作拜祭,並向他為PinkFloyd設計《Animals》專輯的「飛天豬」作致敬 。」

最後嗰句,佢係講緊乜0架?其實袁老總話明係音樂人,佢所指嘅PinkFloyd,就係英國傳奇迷幻搖滾樂隊;而StormThorgerson,就係為呢隊樂隊設計唱片封套嘅GraphicDesigner。1977年,Storm為樂隊嘅第10張大碟設計封面,喺倫敦西南面一間棄置咗嘅工廠,吊上一隻用氫氣吹氣豬,佢有名添0架,叫Algie,呢個經典嘅唱片封套就完成咗喇。

其實當時仲有段小插曲,拍攝嘅第二日,綁住隻「飛天豬」嘅繩斷咗,搞到隻豬一路飛上3000呎高空,連飛機都要讓路呀!依家呢間工廠成為咗地標,隻飛天豬都會不時「飛」出嚟同人見吓面,好多樂迷、PinkFloyd迷都會去朝聖0架。

香港想搵隻巨型燒乳豬做景點,唔好話同真正嘅「飛天豬」鬥,連想同荷蘭過嚟嘅巨型鴨鴨鬥,都輸幾十條街啦!

唔知第一個發現西九「篤屎」嘅森美,對呢篤吹氣大便同吹氣乳豬有何觀感呢?