【教父被炒】踢過五場愛‧回家? 文仙尼繼任熱燙手
李斯特城文仙尼雲尼亞里
【新增動新聞】
殘酷嘅現實唔會畀受傷嘅狐狸舔舐傷口,冇咗雲尼亞里嘅李斯特城依然要雙線奮戰,首場比賽係下周一夜場英超主場迎戰利物浦,3月15日亦要喺王權球場出戰歐聯16強次回合,力爭平反落後西維爾1:2嘅敗局。
英國博彩公司亦迅即開出李城下任領隊賠率,其中雲尼亞里嘅意大利同胞、自去年8月同國際米蘭「分手」後就未有教職嘅文仙尼成為繼任大熱,52歲嘅文仙尼喺2001年職業生涯尾聲由拉素外借至李城,可惜只係踢過5場波就扭計話返意大利,仲即刻做埋費倫天拿教練!不過,佢後來都有賣口乖,話呢段短暫時光令佢愛上英格蘭足球,後來先會教曼城兼贏埋英超喎。其餘熱門人選包括前水晶宮領隊柏度、當年因兒子捲入「群交」醜聞而下台嘅前李城領隊皮亞臣同前阿積士教練法蘭迪保亞。另外,英國《每日郵報》就認為擅長季中救火做替工嘅荷蘭名帥軒迪克,以至帶下游隊相當有經驗嘅前新特蘭領隊奧尼爾都有機會接過呢個燙手山芋。
李城下任領隊賠率
文仙尼(前國際米蘭教練) 2倍
皮亞臣(前李斯特城領隊) 6倍
柏度(前水晶宮領隊) 7倍
路維特(前伯明翰領隊) 9倍
法蘭迪保亞(前阿積士教練) 11倍
賠率來源:英國skyBET