陳慧琳事隔兩年再推出新歌《花見小路》同《Be with you》，今日喺商台宣傳，佢見到吳業坤，顯出前輩大將之風，主動打招呼，Kelly講到《花》係唯美，充滿意境嘅歌，呢首歌好多高音位，佢自言以前難架馭到，o依家就可以。

問佢係咪教仔教得多幫助練氣？陳慧琳笑言：「係呀，開咗個高音位，開咗8年聲，雖然教仔唔使勞氣，但有時喝佢哋都要有力，用丹田氣叫出嚟。」

呢排宣傳多咗，遲啲細仔劉琛幼稚園畢業都冇時間出席，Kelly話：「佢都唔知咩叫畢業，唔覺嘅，爸爸、哥哥都會去，佢最緊要偶像哥哥去就得，我喺佢心目中都係排第二。」但係之後暑假，陳慧琳為咗一家人去旅行，音樂會會延遲舉行，預計去英國旅行，兼跟大仔劉昇慶祝生日。

精選娛聞，喺晒《娛果》
http://fb.com/appledailyent