新世界發展（017）自從創辦人鄭裕彤退位，由二、三代掌舵後，新人事新作風，除咗大搞品牌形象之外，亦好積極向其他對手挖角，新地（016）隨即變成新世界嘅人才寶庫。
新世界今年初就重金禮聘，搵嚟新地老臣子蘇仲強過檔，主席鄭家純一早諗好，新世界成功私有化新世界中國之後，就將新中嘅內地業務交畀蘇仲強負責。
蘇仲強喺新地工作35年，主要負責南中國業務，過檔新世界前其實已經半退休，喺合景泰富（1813）做顧問。噚日新世界舉行業績會，純官特登介紹蘇仲強嘅新團隊，好似打完獵返嚟晒獵物咁。

打理新中內地業務

蘇仲強現為新中行政總裁，佢打趣話自己一把年紀，但仲好健康同精神，又賣口乖話加入之前，鄭家已經建立咗一個相當優良嘅團隊。佢希望多年來喺內地累積嘅經驗，可以幫到新中做出成績，「作為我離開呢個行業前，一個比較完美嘅完結」，果然係薑係老嘅辣。
蘇仲強現時手下兩名副行政總裁黃少媚與陳禮文亦係新地舊臣，大家合作多年，跟埋一齊過去新世界都好合理。
以財經角度，唔講純官早幾年忽然轉做「梁粉」，單睇公司業績與形象，近年的確進步唔少，新話事人一路幫公司換血，效果似乎唔錯，不過好多事情都要睇長遠嘅。

李華華
mailto:[email protected]