陳鈺芸(JuJu)噚晚喺尖沙嘴搞生日party，原來之前話會到嘅王敏德、李蘊同李曼筠，全部唔見人，好彩仲有逢請必到嘅白健恩同區文詩撐場。

話就話係生日party，原來又係拜師宴，佢拜徐家傑做師傅打泰拳，所以壽星女將自己打扮到一個拳手咁款，露腰又露事業線，驚人唔知佢打得，喺跆拳道公開賽拎過獎。

JuJu唔肯講幾多歲生日，維基顯示佢今年28歲。JuJu話過咗20歲之後，就唔再公開年齡，都係講番打拳:「嚟黎緊有場泰拳及跆拳道比賽要打，依家努力減磅，所以生日飯都唔敢食，只係叫朋友送同打拳有關嘅禮物畀我已經好滿足。」

JuJu又自爆王敏德應承咗星期一帶佢遊直升機河，聽到都興奮喎。佢話生日願望係想贏到打拳比賽冠軍，亦想搵個男朋友，以前試過畀舊情人打，所以至會走去學打拳。