烏克蘭戰雲密佈，北韓又連環試射導彈，港股立即腳軟，埋單唔見336點，其實算跌得少，事關A股有兩會因素撐住，逆市升近1%。在港上市嘅醫療、新能源股齊齊開party，證明概念股有價有市。如果能夠一次過滿足三個願望，就更加值得畀like，講緊嘅就係世紀陽光（509）。世紀陽光有乜咁巴閉？三句講晒︰業績靚爆、憧憬分拆、強人入股。先講業績，喺金屬鎂產品及農業肥料業務雙引擎帶動下，截至去年6月底止，中期盈利按年狂升九成，早前亦已發盈喜，全年業績將保持強勢，市盈率勢將降至單位數，正！

再講分拆，金屬鎂產品及農業肥料業務，分佔分部業績40%及58%，絕對可以用各領風騷嚟形容，是但分拆一項上市，都絕對冇難度。事實上，鎂合金用途廣泛，由航空航天到手機notebook都有佢份，加上鎂合金較一般金屬輕，若應用於汽車及飛機上，更可收節能之效，連環保概念都食埋，絕！
咁多賣點，難怪獲得世界銀行成員國際金融公司垂青。IFC年初斥資1.2億銀，入股世紀陽光5.6%股權，有世銀做後盾，要搵低息貸款做收購合併，肯定易如反掌，掂！
世紀陽光噚日逆市炒高3%，突破近日嘅橫行區，靚圖！配合明日公佈嘅靚靚成績表，上破2月初高位1.13元指日可待，買定有着數。

唐牛