羅馬集團(8072)昨晚宣佈，搵來識得「應肚即飛」神功嘅美聯前高層黃錦康加盟，擔任首席策略官，需知道黃師傅近5年相當低調，冇幫人打工，今次可算係出山。問佢有乜大計，佢就話仲度緊，反而好高興咁同大家講，佢近年功力大增，練成一陽指，「我用隻手指掂一掂人，(對方)就會彈開」。勁喎。

提起黃錦康，實在不得不提佢嘅獨門神功應肚即飛，想當年，2012年倫敦奧運期間，佢花500萬推廣自創獨門太極拳奇招，示範一招應肚即飛，當師弟一拳打向黃師傅肚皮，即刻被彈開，呢條片至今仍是財金界熱話。

黃師傅話，佢過去5年潛心修行，家陣佢嘅功夫已經包含理論基礎，可以同人解釋到，而見肚即飛只係初階，佢仲練成一陽指㖭。佢話，已經收咗唔少徒弟，不過唔係人人都啱，要講緣份，「有人出100萬，我都唔教」。

講完功夫，講番羅馬集團。羅馬早前被廉署上門拉人，涉事嘅陸紀仁辭去主席同行政總裁職務。黃師傅指，加盟公司都係經朋友介紹，講緣份，佢呢個策略師有何大計呢?佢仲度緊，不過公司快將搬寫字樓，有「新天新地」咁話。羅馬今日升咗12%，收報7.6仙。

掌握財經生活資訊，即Like「蘋果ATM」fb專頁啦！
http://fb.com/appledailyatm