由於有好多上周三（18日）取消賽事出賽馬，都被安排在周三（25日）再上陣，形勢變得更為緊湊，練馬師方面，方嘉柏佈下強陣，八匹參戰馬全部有備而來，最緊要有潘頓、雷神，再加埋華將一哥何澤堯，其中六場「帖木兒」及七場「成才」都係心儀之選。

第六場三班1000米，經常都講谷草1000米極不利後追，急彎短直路，除非擁有過人質素及能力。「帖木兒」上季只跑過兩仗，第二次上陣便在同程後追跑第三，翻睇巡邏影片，直路頭300米處於宭境，最後50米望空後，潘頓才郁手打鞭，以方廐馬一貫慢熱作風，加上傷患底，仍可交出水準，就知道質素唔簡單。

「帖木兒」一月跑後未再上陣，操練斷斷續續，但在五月尾開始就從未缺過課，由於本身昂頭難騎，非一般助手可以控制，在從化馬房專登安排由老師傅副練張德明，每日在內圈慢火煎魚式操練，唔太介意試閘有頭冇尾，反而洩過啖躁火之後，更有利於陣上發揮，抽一檔形勢有利，只要前段步速扯得夠快，便有權殺出重圍。

第七場三班1200米，四匹新勝馬中，「醒目勇駒」上仗賺形勢贏馬，但睇臨場行圈至閘前表現，仍然周身郁未馴，要多方面配合才可以跑出水準。「轉數高」及「劍追風」都係縮程，後駒最大變數係轉摩廐初出，試閘亦見好，但排12檔認真難跑。

「成才」休息四個月，儲滿新鮮感，由七月尾復課開始整個操練程序，大細閘、拍跳樣樣做齊，最鍾意係排位日馬會公佈體重增加29磅，潘頓騎過五次取一冠兩季熟知脾性，上季尾三兩箭步便將「醒目勇駒」追過，根本質素擺明高過對手，當日受讓一磅，今戰負磅一樣，黃金一檔起步後可守在食糊位置，要再砌低「醒目勇駒」，有充分理據支持。

-------------------------------
參加《玄機解馬》節目，可免費畀美女堪輿學家唐碧霞睇八字、睇相指點迷津，快啲入嚟報名。
https://forms.gle/dN9hfSiFxc7T8E436
-------------------------------
馬匹賽績、騎練數據、名家貼士
【最強贏錢武器 盡在蘋果馬網】
https://hk.adai.ly/e/5nFdCiYq8Y
-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港