90年代人氣動畫《咕嚕咕嚕魔法陣》今年回歸螢光幕，全新一輯電視動畫早前宣佈今年夏天登場，負責製作嘅Production I.G方面開始公佈新作詳情，到時會安排於深夜時份播出，日前已落實主角嘅配音員陣容，自稱勇者嘅仁傑及眼大大紮孖辮嘅小魔女歌莉，分別由石上静香同埋小原好美聲演，而故事中最騎呢又搶眼嘅「結他他老伯」就由小西克幸負責配音。

《咕嚕咕嚕魔法陣》係衛藤浩幸創作嘅魔法冒險漫畫，早於1994年首次電視動畫化，2000年推出系列第二輯，係唔少香港人嘅童年回憶。《咕嚕咕嚕魔法陣》開始展開宣傳，幾位主要聲優上月底出席AnimeJapan 2017造勢，而9月舉行嘅京都國際動漫博覽2017，亦決定借《咕嚕咕嚕魔法陣》配合宣傳，今次會大玩Crossover，安排歌莉孖仁傑置身京都嘅貴船神社，希望可以吸更多海外動漫迷參與今年盛會。