呢個紅館騷，真係好有賀年feel，開場半個鐘已經落台同fans握手，又拉觀眾上台chit chat。

玩完握手，又同歌迷嘴對嘴之後，輪到子華神黃子華出場。

咪激動住，黃子華係拍短片，扮新聞報道員出場，負責解釋歌神嘅意義。子華解釋，0依家有雙位數嘅人，就稱之為男神，或者女神。「九龍西，神多過人，大家唔好濫用『神』呢一樣嘢。」

咁「神」的意義是甚麼？子華以「歌神」為例：「神係由冇到有創造出嚟，歌神許冠傑就係創造粵語流行曲，其實歌神唱粵語歌之前，已經有粵語歌，但大家就唔係好記得有咩歌流行。

「大家都忘記咗許冠傑之前嘅粵唔歌，啲歌詞好犀利，好似『拎冧六 長衫六　高腳七……』（編按：此曲是鄭君綿《賭仔自歎》）」

之後子華唱《鐵塔凌雲》，續道：「o依家啲人，口講嘅核心價值，70年代嘅核心價值就係許冠傑。為兩餐乜都肯制呀前世，講完！

「o依家啲人因為一首歌而紅，但許冠傑就將廣東歌變紅，廣東歌遇許冠傑就紅咗。呢樣嘢唔係我講，係維基講。」

跟住黃子華就讀番維基寫嘅嘢﹕「70年代許冠傑好受歡迎，因為係大學生，佢唱廣東歌之後，就將廣東歌嘅形象改晒。

「以前廣東歌俾人印象改晒，因為以前廣東歌俾人印象好粗俗，令唔鍾意廣東歌都變鍾意，神就係咁意思。」觀眾歡呼聲四起。

黃子華講完後，Sam就單人唱自己多首舊歌，好多女dancers為之伴舞，dancers仲好醒目攬住Sam條腰傍住佢。