【想學歐陽巧瑩解放】鄧健泓怕老婆被睇蝕 唔畀石詠莉裸泳
鄧健泓林奕匡石詠莉
石詠莉、林奕匡、小塵埃今日到維園出席活動,稍後25號係石詠莉32歲生日,29號則係同老公鄧健泓嘅結婚紀念日,佢話老公秘密安排咗一個泰國之旅,今晚會出發,到29日前趕返香港出席樂壇頒獎禮。
石詠莉話自己從未去過泰國,老公安排呢個旅程係生日同結婚周年禮物,佢一一收貨,仲話:「其實佢做乜我都開心,過咗廿五歲已經冇刻意計年齡。」去到熱帶地方雖然都會帶泳衣,但就唔能夠大解放:「喺呢方面有規限,就算二人世界老公都唔會畀我性感,驚畀人睇晒。」近日林師傑同歐陽巧瑩去到馬爾代夫度蜜月時影全裸相,石詠莉話:「我哋之前都去過馬爾代夫幾次,都曾經想過裸泳,但萬一有船經過咁咪睇晒?老公話千祈唔好,一係下次我提議老公天體,我操刀影相用隻鴨仔遮住佢重要部位,不過驚銷量大減。」
蕭定一旗下hmv清盤,現時鄧健泓同蕭定一有經理人合約,石詠莉話:「蕭定一係我舊老闆,暫時唔覺對老公有咩影響,工作一路都有做,出糧方面冇問題, hmv同經理人部門係分開,但聽到呢個消息都覺得好不幸,我都係蕭定一第一批簽嘅藝人,我有send message畀佢,人生就係咁,有高低起跌,我同Patrick都無限支持阿一。」
林奕匡推出新歌《花灑下的歌》,在MV中有一個露背淋浴鏡頭,見到佢背脊好白,佢話:「老婆睇完都笑,佢平時見人哋係嘩嘩嘩,佢睇完覺得我露唔夠,如果早啲知道要拍mv,就可以操大隻啲。」
精選娛聞,喺晒《娛果》
http://fb.com/appledailyent
石詠莉嚟緊會同老公鄧健泓去泰國旅行,慶祝生日兼結婚紀念日