DiabloII全年最好賣日銷600隻
2001年話咁快又過去，相信大家上年都玩過唔少PCGame，我哋今日特別訪問咗賣PCGame嘅舖頭，同近年勁Hit嘅網絡遊戲機中心（CyberCafe）場負責人，雖然佢哋所講「最多人玩」同「最多人買」嘅Game有啲唔同，不過大家有一個共通點，就係全部都可以做網絡連線對戰，尤其係《DiabloII》，高峯期一日賣出五、六百隻，足足贏對手成條街！ 文：李淮 協力：周麗懿 攝影：陳穎、伍慶泉
CowLevel狂牛大屠殺
筆者玩《DiabloII》最深刻嗰幕，都可以算係第一次同朋友打CowLevel，一出Portal已經見到班狂牛遮晒成個畫面咁湧埋嚟，所以一定要走嚟走去避開包圍網，雖然好鬼踢腳，不過真係好有大屠殺Feel，好少Game可以畀到呢種咁震撼嘅場面。
玩足成年打壞幾隻Mouse
「玩咗成年《DiabloII》，前前後後足足換咗幾隻Mouse，鑊鑊都係壞左邊個掣，可想而知我對隻Game幾咁熱衷。《DiabloII》好玩成點？嘩你唔係咁都要問呀？」
「單係佢嘅戰鬥方式已經夠晒激啦！完全滿足晒你想一個打幾十個嘅心理，續集故事同任務又Detail咗好多，重支援八人對戰，加埋林林總總嘅特別Item……唉！總之今年最佳遊戲非佢莫屬啦！」
PCGame舖
熱賣首選：《DiabloII》
賣家：九哥（旺電E.D.C.Express老闆）
「數今年最好賣嘅PCGame，一定係《DiabloII》！佢差唔多佔咗我全年營業額嘅20%，喺6、7月剛推出時嘅銷售高峯期，一日閒閒哋可以賣到500至600隻，真係收錢找錢都做到手軟。」
「諗番起當初來貨真係非常緊張，本身有落訂嘅客都差啲唔夠派，一開口話要五盒嘅亦大有人在。而限量版就更加唔使講，身為Fans之一嘅我，梗係要留番盒畀自己先啦！」
熱賣次選：《RinbowsSix:RogueSpear》
「第一身戰略射擊遊戲」一哥
九哥：「第一集由冇乜人玩到突然人氣急升，我哋睇見梗係開心啦！不過最慘係續集《RogueSpear》，喺美國出街之後差唔多成個月先到香港，搞到啲客日日殺入嚟係咁問我『批貨到咗未！』，我哋惟有勸佢畀啲耐性等多陣，千祈唔好玩老翻呀咁，真係好大壓力㗎！」
毋庸置疑，《RogueSpear》可以講係將第一身戰略射擊遊戲帶入全盛期嘅力作，想當年好多人原本係《Quake》嘅死忠Fans，玩過《RogueSpear》之後先知道一槍致死可以咁過癮、咁有成功感！
747打出團隊合作精神
提到版圖，《RogueSpear》嘅經典戰場真係多不勝數，好似747、Bunkers、TrainYard、WarehouseDistrict，都屬必玩然後再玩嘅Map，不過論人氣度，747嘅攻防戰最為人津津樂道，攻的一方要提防對方死守入口，防的一方又要兼顧前、後兩個入口，完全可以發揮到《RogueSpear》嘅團隊式合作精神。
網絡遊戲機中心
熱玩首選：《GhostRecon》
Ken（CyberCityOnline負責人）：
「近年網絡遊戲機中心，一直都係《RogueSpear》同《CounterStrike》主導，基本上不論男女上嚟幫襯，都係玩呢兩隻Game。不過自從《GhostRecon》推出之後，形勢就一面倒咁改變，差唔多個個客都轉玩《GhostRecon》，我哋重吸納咗一班鍾意打WarGame嘅忠實擁躉㖭。由於《GhostRecon》遊戲節奏較《RogueSpear》同《CounterStrike》慢，顧客相應對Game場嘅服務要求都高咗，喺呢方面我哋都盡量滿足顧客嘅要求，提供最舒適嘅環境，等佢哋可以盡情一邊打一邊傾用乜嘢戰術。」
M10-FEVERCLAW絕對雷霆救兵感覺
筆者第一次玩《GhostRecon》Demo，經已感覺到遊戲具備濃厚嘅戰場Feel。當你匿埋喺樹後面，子彈不斷「啪啪」聲打埋嚟，敵人又唔知喺邊忽嘅時候，嗰種壓迫感真係同打WarGame冇乜分別。遊戲中各款槍械在不同射擊模式（如單發和連射）下產生嘅彈道偏差，亦大大加強駁火味道，尤其對AI最過癮，唔會好似《RogueSpear》咁嘢嘢中。除此之外，《GhostRecon》重成功將多套電影嘅槍戰場景引入遊戲，當中以M10-FEVERCLAW一版最成功，行動目標主要是配合友軍坦克推進，坦克車聲加槍炮聲，再加上戰場嘅廢城，十足十《雷霆救兵》最後一幕，絕對是全Game最正版圖。