如果你曾經買過自己心愛球隊嘅波衫或其他精品，着舊咗或用舊咗想換件新的話，可能唔使破費，只要學阿占咁就得。

阿占（Jim Entwistle）係一名住喺英國約克夏郡北部嘅球迷，最近喺Twitter放咗張相，影住一隻拜仁慕尼黑嘅舊杯，好有感情咁寫：「呢隻杯裝過無數酒後，今日要榮休喇！」

原來隻杯陪伴咗阿占21年，但大家唔好以為佢有隻拜仁杯，就係拜仁球迷，反而佢係一位諾定咸森林球迷。隻杯係當年佢住喺德國嘅阿叔，特登玩嘢寄畀佢嘅生日禮物，揶揄佢隊森林喺1996年歐洲足協盃輸畀拜仁，但阿占用下用下，就用咗成廿年，好有感情。

阿占冇諗過呢個post引嚟咁大迴響，有好多拜仁fans因為咁而關注咗佢，仲留言話想高價向佢收購呢隻有「歷史意義」嘅舊杯，亦驚動埋拜仁班網上公關，佢哋出咗封信，答謝阿占咁多年嘅「忠心」，仲話寄番隻球會新杯畀佢。阿占收到後，亦自拍咗一張拎住拜仁新杯嘅相放上網，多謝對方。