當年今日
關於我們

【棟析先機】谷草唯一出路 賀賢瞄準出擊目標(陳華棟)

蘋果日報 2019/09/17 22:00

陳華棟棟析先機活力寶駒賀賢

近期有一篇文字係關於大摩響香港嘅歷史,講到佢服務香港賽馬四十年,但其實點止四十年咁少,有足足四十八年啊!
我阿棟曾經響七一年,喺某報任駐馬場記者嘅時候,喺欄邊訪問過當時初嚟報到嘅大摩,我仲記得佢個子高又靚仔,而佢接受訪問嘅時間,話明自己騎功渣,遲啲嚟嘅摩加利會勁得多,而策騎事業一般嘅佢,好快亦退居幕後,幫爸爸佐治摩亞(老摩)處理馬房事務,最後仲成就咗大摩響香港練馬師界嘅傳奇!
今次(18日)先介紹第二場四班1650米,賀賢馬房嘅「活力寶駒」。呢匹馬跑咗16場只係得三場季軍,實力肯定係名大於實。但好彩嘅係,仲搵到谷中一哩係出路,瞄準最佳路程出擊,擺明有計。
今季狀態嚟得幾好,雷神肯騎對手又少,海軍鬥水兵場合,健康正常嘅馬可望開勝門。
第三場四班1650米嘅「肥仔威威」上季表現明明好哋哋,但上季最後一場用到潘頓壓陣,成為兩倍大熱嗰陣就輸到接近拉停過終點,輸到75個馬位之後,又驗唔到有乜嘢問題,就當健康正常啦!
暑假一分都冇減,睇得出評磅員好睇得起佢,用上方仔愛將何澤堯,能力評分都著數,今場機會極大。
最後揀埋第五場四班1200米嘅「快樂歡騰」,計路程、性能同質素,都比同組馬高半班,但長期出閘有問題,搞到依家仲未贏馬。
其實有呢類問題嘅馬,喺七八十年代時,可以喺馬匹入閘後,安排人手去安撫馬匹,仲可以搵人逗馬尾,而當時同阿棟熟絡嘅司閘員,更話有踢馬屎眼呢個「絕招」(保證包唔漏閘)。不過,依家你咁搞法,實有愛護動物組織嚟拜候你!
講番匹馬,轉倉首戰除埋眼罩,有晒新鮮感,出閘無問題就可以贏番一場交代!
-------------------------------
參加《玄機解馬》節目,可免費畀美女堪輿學家唐碧霞睇八字、睇相指點迷津,快啲入嚟報名。
https://forms.gle/dN9hfSiFxc7T8E436
-------------------------------
馬匹賽績、騎練數據、名家貼士
【最強贏錢武器 盡在蘋果馬網】
https://hk.adai.ly/e/5nFdCiYq8Y
-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港