港股上周出現突破性走勢，恒指全周大升421點，但升勢集中在上周一，餘下4日，只是在高位窄幅整固，成交亦縮減，現階段大市似在收集而非派發，後市會反覆向上。
大行同基金收集得頗為用心，並採用輪流出擊招數，買兩三日內房股，股價上升後，就會收手，轉而買保險股，兩三日後，又會再轉移目標，如此這般，買買停停，股價唔會大幅搶高，但基金就可以買到貨，到時機成熟，大市升勢就會再起。
今日推介嘅香港建設（190），係典型嘅基金股，兩大基金已持38%股權，加上大股東揸35.2%，共持7成多。兩大基金07年入股價超過2元，揸到今時今日，好長情，也可見基金對香港建設的信心。港建上周五收0.65元，升3仙，現價比基金入股價仍低68%！
港建係大落後股，08年底到09年初股市最低潮時，港建（唔計08年10月恐慌拋售嗰幾日）大致跌到0.40元水平，今時今日，好多股票都已升咗幾個開，但港建仍在0.60元水平橫行，上周五計，比低位亦只升咗62%，大大落後，基金股有特性，一係唔郁，一郁就會大力催谷。港建上周五已有異動，升勢似一觸即發。

兩大業務進入收成期

港建業務單純，只有兩瓣，就係內地房地產同新能源，內房股由低位起嘅升幅已以倍計，而新能源又係中央大力催谷同扶持嘅項目，正可謂食正條水，今年房地產同新能源業務開始進入收成期，股價發力時機成熟。
港建08年（12月年結）因資產減值而大幅虧損26億元，09年度中期已轉盈3.77億元，最近發出「盈喜」，涉及投資物業重估收益，大數賺幾多，起碼10億元過外。港建每股NAV1.20元，連資產升值計，應可去到1.40元，現價大大偏低。
港建上周五突升，已出現全面入貨訊號，初步目標為0.80元，中線可重上1.20元水平，翻一番。
郭兆誠