求驗客手記:悉尼和紅鑽踢恒大出局

蘋果日報 2016/04/21 00:00


FC廣州亞冠盃衞冕失敗!雖然FC廣州(恒大)周二作客擊敗浦項制鐵,但亞冠盃H組出線「鹽水」吊到周三終於玩完,FC悉尼主場對浦和紅鑽,合演一場悶波賽和0:0,呢個亦係雙方最滿意嘅戰果,因為雙雙出線,而FC廣州就肯定出局。
其實經過周二之戰,賽前有九分嘅FC悉尼已經出線,雖然擊敗紅鑽就可以拎首名,但始終穩字行頭,全場都屯重兵於後防,紅鑽就有前鋒武藤雄樹(右)同興梠慎三分別喺上、下半場都錯失黃金機會,結果作客拎一分。經過五輪分組賽,FC悉尼累積10分已經肯定出線,浦和紅鑽有八分,比FC廣州多三分,加上對賽佔優,亦都肯定出線,FC廣州就宣佈出局。
好彩其他中超球隊亞冠盃戰績都唔錯,繼上海SP周二大勝肯定G組首名外,F組大戰,FC山東(魯能)主場1:0擊敗廣島三箭,而同日FC首爾2:1擊敗武里南聯,同山東雙雙出線;FC江蘇(蘇寧)喺E組亦以3:0輕取平陽,升上次席。