【新增動新聞】
身為皇家馬德里捧盃英雄，C朗講嘢自然大聲啲！周日西甲煞科日，皇馬憑基斯坦奴朗拿度（C朗）早喺兩分鐘入波，加埋賓施馬下半場建功，作客2:0擊敗馬拉加，最終38戰得93分，以3分力壓同日主場4:2擊敗伊巴嘅巴塞隆拿，重奪失落4屆嘅聯賽冠軍，更係連續8季西甲取得「25+」入球，絕對居功至偉！

不過，C朗近日同樣備受傳媒指控，除咗俾德國《明鏡周刊》指控佢早年以掩口費隱瞞強姦案，早前聯賽作客4:1擊敗切爾達一仗，亦被拍到造出手勢暗示對手接受第三方利益而刻意搏命阻止佢哋封王。C朗賽後接受《馬卡報》訪問時就向批評者大反擊：「外界好似當我係罪犯咁談論，其實佢哋乜X都唔知。我唔係聖人，但我亦唔係魔鬼。我從來唔睇電視，否則要應付呢啲指控根本冇可能生活，佢哋誤會咗我喺場內場外嘅為人。」完成西甲封王任務後，仲有下月對祖雲達斯嘅歐聯決賽，C朗就話：「我好高興今季有個美滿結局，全賴有智慧嘅管理層、教練嘅幫忙同埋較少上陣嘅球員支援。我哋知道歐聯決賽好難應付，但目前先慶祝5年來首個西甲錦標啦！」