當年今日
關於我們

【韓流】USB唔當專輯計銷量 GD爆seed:到底是甚麼問題?

蘋果日報 2017/06/15 11:30

USB權志龍GD

【新增YG方面回應】
韓國天團BIGBANG嘅隊長G-DRAGON(GD)上周推出Solo回歸專輯《權志龍》,又於上周六喺首爾舉行演唱會,嚟緊周六及周日更會喺澳門開騷。
上周GD專輯一推出,即包攬包括美國在內嘅海外39個國家及地區iTunes專輯榜單嘅冠軍,破盡紀錄成為韓國藝人史上最多紀錄,同時專輯亦穩坐韓國多個音源榜嘅榜首,單喺大陸音樂平台QQ音樂已出售逾百萬張音源,認真犀利。
而今次GD新專輯就反傳統,唔以CD形式出售,反而方便應用喺電子產品方面,所以就以USB形式當專輯,當中USB內係冇音樂,只提供網址提供音樂,並將於下周一公開於實體店舖出售,不過韓國音樂產業協會就話USB唔可以被認定做音樂專輯,USB只能當作係音源下載嘅用具,所以就唔認定佢係專輯,不過假如USB內有音樂就有機會承認做專輯,不過暫時因為事件就令到GD呢隻專輯唔可以紀錄於韓國權威流行榜Gaon嘅專輯銷售榜單,同時亦都有機會影響到GD新歌喺各大電視台、電台嘅排名,因為SBS同MBC都以Gaon排名做基準。
對於自己嘅結晶品唔被當作專輯,GD今日就喺Instagram爆seed話:「What's the problem?」,又留言:「一個根本唔認識我係邊個嘅人來決定我嘅作品係唔係專輯個理由係甚麼?雖然一定有優點同缺點,但從錄音帶到CD,再到可以下載嘅音源,外形雖然一直都喺改變,可是其實最重要嘅難道唔係就算經過時間同歲月流逝後,仍然能喺心內耳朵內,喺腦海中回憶裏留下來嘅好音樂同埋歌詞嗎?」
對於USB係唔係專輯呢個爭議,Gaon方面相關人士回應傳媒就話現時GD隻USB係唔係當專輯仍未有定論,並表示向文化部遞交咗報告,目前正等待回覆。
至於GD所屬嘅YG事務所對於GD嘅USB專輯嘅爭議就發表官方立場,首先YG方面話平日CD只得700M容量,但今次GD呢隻USB有4GB容量,當中可以放數十首音樂,亦可以放下高清MV,而當USB接駁到電腦後就可以登錄特定服務網站,喺網站內不僅能下載新專輯嘅音樂,亦都也可以下載YG方面提供嘅GD照片(當中直到年底)及MV等相關內容。
YG表示其實佢哋對於Gaon嘅統計方式唔係存在不滿或者異議,只係認為目前情況係冇跟上時代節奏,USB係GD為粉絲提供更加多樣化嘅資訊而選擇嘅方法,所以不明白點解一定要用CD,同時又指基本上現時連老人家都唔會用CD播放器聽音樂,一般人亦都唔會利用CD儲存資訊,所以要限制用CD來作專輯,佢哋認為唔係好普遍嘅想法。
empty
GD爆seed問:「What\'s the problem?」
empty
《權志龍》喺大陸已出售逾百萬張音源