【本報訊】九巴現時聘有近8,000名車長，平均年齡47歲，對於大學畢業生為夢想轉行揸巴士，資深獵頭專家張慧敏稱，以前的僱主可能會覺得這做法匪夷所思，但現時大家的看法已大有不同，「呢啲係人生經歷同體驗，揸巴士都係一種服務，各式各樣嘅人種你都見到，對你做人做事係磨練」。

張慧敏又謂，應徵者擁有別人沒有的經驗，反而令僱主有興趣想了解他，勝過一個普通的大學畢業生。「有目標有夢想嘅人，做起事上嚟嘅熱誠、主動性已贏好多！」

學友社學生輔導中心總幹事列豪章表示，就業機會及經濟發展有密切關係，以前的大學畢業生會累積經驗，期望爬到中高層，追求工作上的成就，但現今的大學畢業生則較重視工作素質，因此近年越來越多人放棄高薪厚職，往外國流浪或工作假期。