咩叫rap，噚晚勁歌頒獎典禮主持陸浩明(6號)以極投入嘅自high mode，搵咗何雁詩、吳業坤同JW即場freestyle，帶觀眾挑戰「勇者塔」。究竟要幾大勇氣先可以跳住Coincidance(甩膊舞)去唱自己個名同介紹自己……

個畫面真係令唔少觀眾出現至少十個「黑人問號」，網民今早瘋傳，總結得出一個數字，有網民問係唔係要「玩到_盡頭變經典」。

如果你有細心睇吓條片，聽吓佢哋噏啲乜…此刻最經典應該係JW疑似爆粗，唔知講「X」定係「妖」。咁聽大部分嘅網民講都係聽到一個「尸」字有關嘅字。相當吊詭!

件事就係發生喺6號叫幾個歌手rap嚟介紹，其實個個歌手都唔知要講啲咩，場面好尷尬，當去到JW要講時，JW爆咗句：「X!冇諗過(有人聽到係『冇X過』)，問我……個名叫王灝兒，跟住諗唔到…」6號接住講：「唱歌唱得好自然，好好呀!」主持搞到氣氛怪怪都未夠，之後6號、麥明詩同馮盈盈仲要一齊跳Coincidance講出得獎者個名。

《蘋果》今日向JW求證，佢堅持話：「梗係唔會爆粗喇!點會爆粗，係佢問我，叫我接嘅時候，我話死喇，我冇諗過，點會喺TVB爆粗呢，冇可能。」

唔少網民都封呢個畫面係「今年尷尬之最」、「1+6嘅事件」、「X到唔敢睇系列」，亦有人問大台係唔係玩一眾歌手，該網民留言：「歌手唔係玩開freestyle，你玩呢啲搞到人出醜，要玩，搵農夫玩嘛，人哋應該搭到幾句。」另有網民就覺得唔難諗，即刻亂嚟都算rap到：「佢個名叫何雁詩，唔係好識rap呢啲，佢個男友叫阿Fred，成日唔識講爛gag，樂壇有個吳業坤，俾前輩寸眼甘甘，佢個friend叫胡鴻鈞，石敢當能屈能伸。自己都覺得好九唔搭八。」

唔知呢個畫面比起「關家姐事件」、「09年Bosco同Eason合唱《K歌之王》」。邊件事令大家印象深啲?

【minigame】2017瘋暈人物 返工打機唔使擇日
http://bit.ly/2CeWQkP

更多娛聞，喺晒《娛果》
http://fb.com/appledailyent