去日本旅行都發覺，日本人超級講求規律，例如搭扶手電梯一定企埋一邊，尤其上下班時間，以免阻人上落。不過，呢排去日本玩，就要變通吓，因為當地推行緊「讓大家一起緊握扶手」運動（みんなで手すりにつかまろう）。

內地湖北百貨公司扶手梯意外，一個女人死亡。其實扶手梯意外喺全世界都越來越多，日本所有鐵道公司、成田機場、電扶梯協會、東京都交通局等51個單位，7月21日起至8月31日推行呢個運動，呼籲唔好喺電梯上行走或奔跑，免生意外。

好多地方包括香港都有靠邊站習慣，香港企埋喺右邊，同台灣、美英、法國、韓國一樣，但部分國家係企左邊，如新加坡、新西蘭、澳洲等。

至於日本，一般以為係企左邊，但其實，喺東京、札幌、福岡等的確係企左邊，但大阪、神戶等關西地區就習慣企右邊。日本最早喺1967年，由大阪阪急電鐵梅田站開始效法外國靠邊站嘅。

不過，香港港鐵已經叫大家唔好喺電梯上行走，日本都開始，JR東日本舊年已喺車站1770個扶手梯張貼「步行禁止」標識，因佢哋每年都250宗扶手梯意外。尤其係東京地鐵扶手梯都好鬼長，出意外就好大鑊。

費清＃要生計，也要生活＃毋忘初衷