T博士靜極思動，諗住香港經濟冇乜前途，決定上大陸尋找投資機會，行前搵左丁山飲咖啡，徵求意見。左丁山問佢點解唔留港建港，為政府獻策，為市民謀福利。T博士話：「唔好睇得我咁巴閉，多你兩個學位，唔等於叻過你兩倍，我有好多AO界朋友，佢哋多數做到冇晒士氣，亦不懂上頭嘅大方向，只抱住煮到嚟就食嘅宗旨去服務大眾。香港好難好得番㗎嘞，我想搵一啲好嘅民企埋手，做佢哋顧問，跟住買佢嘅股票，希望十年有成，你認為如何？」

T博士都幾好諗頭，以佢嘅「哥利」、資歷，做內地民企嘅管理顧問，一定冇問題。只係民企良莠不齊，要搵一間好嘅，你估話咁易咩，萬一遇人不淑，資金被套牢，就真係自取其咎，非千萬小心不可。就算俾你買中，民企都可以忽然間變為國企，睇仰融出走美國嘅例子就知道，華晨汽車咁大間公司，股權都係好牙煙㗎咋。
T博士聽完，略有遲疑之色，左丁山反而要鼓勵番佢上去闖天地，總之步步為營，有耐性，吼到實先至落注，千祈唔好大貪，要知道自己唔係三頭六臂至得。T博士讀書多過左丁山好多，學識雖豐富，實戰經驗就比較少，左丁山就見得多商場呃神騙鬼，貪污行賄賣色相嘅招數，T博士今番毅然下海，梗係叫佢小心啦。