韓國人氣劇《奶酪陷阱》女主角金高恩出道4年，原來從未上過綜藝節目，近日佢將寶貴第一次獻咗畀佢偶像「國民MC」劉在錫，日前上咗劉在錫主持嘅《HappyTogether3》節目，金高恩仲自爆因為第一次出演綜藝節目，所以緊張到爆，為咗安定自己嘅心，佢仲專登服食清心丸，有冇咁誇？

金高恩自爆因為佢本身係劉在錫粉絲，所以就好想上節目，劉在錫聽到後即禮尚往來話自己都係金高恩嘅粉絲，仲話由佢演出電影到電視劇，佢都有關注。

而現場主持都大讚金高恩係天然美人，金高恩即搞笑澄清話：「唔係美人，係自然人。」提到佢出道作品《銀嬌》，當中更有裸露鏡頭，金高恩話佢當年係以1敵300人，才能試鏡成功，不過佢就話試鏡純屬偶然：「我認識嘅一位前輩喺劇組工作，我去探佢，就遇到導演，於是傾咗幾句，導演讓我準備一句台詞第二日再嚟面試，點知第二日竟然係選角試鏡，完全唔知道係試鏡，亦好彩唔知道。導演問我係唔係畀我演，我話冇信心，係因為完全冇心理準備。」

而喺《銀嬌》中有大膽情慾戲，金高恩就話：「就因為呢個我先冇立刻下決定，導演畀咗我考慮嘅時間。我當時問佢點解揀中我，佢話我睇起上嚟充滿好奇心。」