世界盃踢到8強，其中一個最觸目嘅球員就係美斯，除咗因為佢係球王之外，今屆次次都救番生佢隊阿根廷，有機會突破「無冕球王」。大概舊年，有香港網民寫咗篇文，講「如果美斯在香港出生」，會係點？然後結論就係「金融和專業受人膜拜」，慨嘆香港讀書功先有出路。

換一個角度，好多人成日話香港淨係發金融地產，如果股神畢菲特生於香港，佢本日記，又會係點？

童年

今日心情真係由天跌落地，我喺屋邨度賣雜誌、賣香口膠同可樂，俾我賺到500蚊，仲多過我成個禮拜嘅零用錢，之後去外婆間士多幫手，外婆都賺我叻仔，開心到爆。

咁啱外婆行開去廁所，我幫佢睇舖，點知有幾個街坊太太喺舖面度吱吱噚，仲打電話，外婆翻嚟冇耐，兩個著制服嘅人，捉咗婆婆埋一邊，係咁話佢，外婆係咁道歉，之後制服友走咗，外婆打畀媽咪叫佢嚟接我走。

回程阿媽一聲都冇出，返到屋企叫我努力溫書，以後都唔好喺屋邨賣嘢同去外婆間舖。

11歲

成日去老豆間證券行，見到啲叔叔嬸嬸成日打電話講股票，我一路都想玩埋一份，偷偷地問老豆借佢個戶口，第一次炒股，買咗乜都唔記得，淨係記得每股38蚊，點知即刻跌到27蚊，仲要畀媽咪知道咗，叫我即刻沽咗佢，話細路學咩賭錢，其實我有信心佢上番40蚊，不過阿媽叫到，冇計。

13歲

shxt，隻股真係上番40蚊，依家仲賣緊200蚊一股，可惜呀，我期學費呀。

算啦，終於上高中了，雖然被老媽子禁止買股票，但我已經開始搞生意，賣馬經，哈哈，不知幾好賣，仲要報稅添，我報咗單車減稅。

高中

搞馬貼士好似發咗場夢咁，冇幾耐有傳媒知道係我做，跟手道德撘利班就上門，話我唔應該鼓勵賭博，又有道德人士話我未夠秤學人評馬，阿媽話升高中準備DSE，最後摺埋。

不過賣馬經都叫賺到錢，我拎咗去買部二手彈珠機，又有間飛髮舖肯畀我擺，睇嚟會大賺。

大學

終於畀我讀到博士，個阿Sir好勁，係價值投資之父，我同佢講細過已經炒股票，可惜畀阿媽制止咗，但都叫揀啱股票，之後有升。

我問佢，可唔可以去佢證券行打工，一開始，佢拒絕咗我，後尾，佢見我有誠意，肯做學師唔收錢，畀我入去試下，點知佢打番去問HR，HR話唔可以唔收錢，要畀最低工資，最後佢話由佢，唉！

畢業

同學仔都考哂CFA、CPA，我有碩士都唔知夠唔夠，雖然做生意加炒股已經賺到73萬（港幣，1950年9800美元），但係阿媽叫我踏實啲搵份工。當年個彈殊機其實有得做，阿媽又叫我專心考試，送咗畀人，後尾其實有人出幾倍價錢同我買。如果當年繼續炒股票會點呢？算啦，都係去報CFA，搵份銀行工。

結論：股神如果生於香港，開正金融呢範，其實都會遇到好多阻力，如果你覺得香港害苦了多少足球界美斯、科學界美斯？我會答，做股神係創業，社會都係覺得讀書搵份銀行工好過，創乜業吖！

高明

神奇‧頂級‧超卓，盡在偶像派財演高明Facebook專頁：
https://www.facebook.com/BigRiceTea