何韻詩個蜜友鄧九雲噚晚喺啟德郵輪碼頭出席軒尼詩V.S.O.P音樂會，著住紅色貼身裙現身。鄧九雲話自己周末就會返台灣，不過今日又會去睇韋羅莎（佢哋一齊做過阿詩齣舞台劇《賈寶玉》0架！）齣舞台劇，問佢阿詩去唔去？鄧九雲就話：「應該也會去。」

早幾日阿詩先話自己去日本旅行有隨行攝影師，問鄧九雲係咪同阿詩去日本旅行兼慶祝生日？佢竟然話生日喺台灣過，唔通阿詩嘅「攝影師」係另有其人？追問佢阿詩有冇去，鄧九雲話：「很多家人人和朋友一起過。」唔想過二人世界咩？佢話比較喜歡同家人同朋友一齊過喎，仲透露阿詩只係送咗句「生日快樂」咋。咁佢幾時畀阿詩做埋家人？鄧九雲話要問返阿詩，因為主持唔係自己。

至於阿詩粉絲喺澳洲買巨型廣告板，代偶像向鄧九雲示愛，問佢知唔知有呢件事？佢反應都幾冷淡咁話：「我完全不知道，我很少看新聞，會不會是一場誤會？我回去會看一下。」對於阿詩粉絲咁接受佢，佢就話任何人鍾意自己都好開心，咁阿詩平日係咪都成日送驚喜畀你先？鄧九雲笑住避開問題：「哈哈哈，今天是參加V.S.O.P的活動，你們問得有點太多了。」

咁…平日有冇飲酒？鄧九雲話同朋友開心就會飲少少，之後問佢阿詩會唔會驚佢飲醉，而唔畀佢飲酒？佢就話：「我們都不喝醉。」仲話唔知同夠詩邊個好酒量啲0添。