上個禮拜嘅《鋒味前奏》講到謝霆鋒戶口試過一百蚊都冇，夠晒貼地。霆鋒講過，以前嘅自己係好自閉，唔想同人溝通，同佢一齊主持節目嘅導演火火就問咁而家嘅霆鋒仲係唔係咁呢？霆鋒話：「o依家嘅我都係好宅，我諗我三個禮拜唔出街絕對冇問題！」

咁鍾意宅喺屋企，火火就同霆鋒嚟個快問快答，火火講一連串香港地方名，睇下霆鋒有冇去過。首先係赤柱大街？霆鋒話：「梗係有啦！我以前住過嗰邊㗎！」青衣戲棚？「拍戲可能有，之後就冇。」女人街？「一定有去過，可能好細個囉。」新都會廣場？「未去過，我聽過個名，但唔知喺邊度。」動植物公園？霆鋒尷尬咁笑，「我未聽過。（火火問：兵頭花園你有冇聽過？）冇啊。」

雖然霆鋒嘅答案有啲出人意表，但係原來佢又會蒲啲好貼地嘅地方，好似深水埗同灣仔機舖：「會去黃金商場買game。十零歲嘅時候我會落去機舖打機，到廿零歲都有，嗰陣時入咗行啦。我會企喺打機嗰個人隔離跟機，等佢打晒擺喺機上面嗰楝錢。我會翹埋對手，望住佢，一副好唔耐煩嘅表情，要俾佢知道：『你打得麻麻哋呀，快啲起身俾我打啦。』咁嗰個人就翹番對手擰轉面望住我，哈哈。」

不過最搞笑就係導演王晶會落機舖搵佢一路打機一路傾劇本：「我以前去得一間最多嘅機舖喺灣仔英皇道對面，o依家變咗個超級市場，落地底，幾千呎㗎！嗰陣時打足球game。阿王晶導演要嚟搵我，擺一袋遊戲卡喺度，嗰陣時我哋就係一路打機一路傾劇本㗎啦。個情況就係，佢問：『咁你拍唔拍啫？』我：話『⋯⋯好吖，拍呀，仲有邊個呀？』『咁幾時開呀？』但我哋對眼係一路望住個mon，隻手不停㩒掣，嗰陣時我哋係咁樣傾劇本㗎。」

精選娛聞，喺晒《娛果》
http://fb.com/appledailyent