聽日小一派位，今次焦點係位於上水清城路香海正覺蓮社佛教正慧小學的跨境學童派位中心，兩個本土組織預告去示威，即刻嚇到成個教育局腳軟，連記者都被列為可能引致不安全元素。

呢單係聽日新聞重點，各個傳媒當然會去採訪，除咗睇住出面，當然仲要報道跨境家長取得派位結果後的喜與悲。

傳媒過往都會致電派位中心，查詢採訪安排，呢次當然要詢問正慧小學如何安排。校長梁翠珍回覆本報時，表明不會准許記者進入校內，並兩度指這是教育局決定，至少是回歸以來，記者首度被禁止進入派位中心採訪。

多間傳媒一整日與教育局周旋，甚至提出妥協的「袋住先」方案，但局方發言人傍晚表示，「由於有團體表示明日會到正慧小學示威，現未能準確評估秩序情況，考慮到安全問題，所以未能安排大家進入內採訪」，講完。

其實近一年來教育局對記者幫助倒退，今年1月傳媒向教育局索取小一統一派位中心名單，以作採訪部署，但明明個多星期前已通知家長，但卻扣起只肯在家長填表前一日才肯給傳媒，最後多家傳媒鬧到吳克儉處，局方才皇恩大赦提前多一日，據講係怕傳媒刊登份名單。吓？冇聽錯，明顯有人評估錯誤。之後記者亦要求到正慧小學校內採訪，校方又拒絕，最後局方介入，才肯作有限制准許，估唔到今次又嚟過。