早排爆出「二噁烷」風波之後，雖然霸王（1338）個老細陳啟源口口聲聲話單嘢可以化危為機，但係話晒洗頭水都叫做貼住頭皮嚟用，消費者點都驚啲有毒物質會滲入皮膚，對品牌同銷路都咪話會無影響。所以呢，陳老闆已經度咗條絕世好橋推啲新產品嚟力挽狂瀾，推乜嘢？草本衞生巾是也！
陳老闆日前同傳媒講，佢哋啲特種衞生巾有消炎同去異味嘅功效，佢覺得中高檔女性護理用品市場好有潛力，應該有得做，而呢個產品佢已經諗咗幾年o架喇。根據計劃，草本衞生巾會喺兩年內推出市場，不過就無講實啲巾有無「翼」！而除咗衞生巾之外，陳老闆仲打算推出草本洗潔精同埋草本牙膏㖭！

消息一出　網民迴響大

霸王衞生巾消息一出，網上討論區即刻有好大迴響，網民除咗關心啲衞生巾含有乜嘢物質之外，更關注嘅係，霸王一向慣咗將代言人個嘜頭放喺產品上面，呢勻搞衞生巾，邊個會係代言人呢？而代言人個樣只係出現喺產品嘅包裝上面，抑或每件獨立包裝嘅巾都有個嘜頭呢？
講開又講，大家應該可以好放心用霸王嘅衞生巾，事關廣東省嶺南中藥文化遺產保護工作領導小組，噚日批准認定霸王「中藥世家」，兼夾將霸王八道秘方納入第二批廣東省嶺南中藥文化遺產保護名錄，如果用完有唔舒服嘅話，記得搵呢嗰工作小組查詢查詢喇！

李華華
mailto:[email protected]