冠軍由5號雷莊𠒇摘冠兼最上鏡小姐，成雙料冠軍。不過，今年嘅評分制度惹來好大爭議，「校長」鄭裕玲(嘟姐)一人可以投兩票，唔少網民都話「嘟姐你玩晒啦」！

嘟姐今日喺商台節目《口水多過浪花》，都有講番呢單咁具爭議嘅港姐競選。佢話自己做過港姐好多唔同崗位，包括星級選民、導師、司儀，到今次做校長，都係睇呢期興乜搞乜。

嘟姐都係喺節目前一日先收到通知自己有兩票：「我真係唔知，仲以為好鬼死嘆！返嚟(公司)都係留意下天氣，驚打8號風球，就冇現場觀眾。當日我哋都有綵排，我專登玩嘢畀同分，例如9號同10號，係3比4，我畀埋9號打和，最後嗰票唔畀9選10，咁好好玩，但心諗好少有咁嘅可能。」

嘟姐話係憑良心投畀5號，絕對冇造馬成份，佢話：「我係睇整體表現，除咗才藝表現我冇睇，但我俾其他人着數，之前已睇咗班女仔一輪，對佢哋有啲認識，我係憑良心，5號表現好好，每個範疇都ok，咁當然人人都有缺點。但絕對冇話咩造馬，有晒會計師行喺度，好難做到，佢哋四、五個人喺現場望實，喺後面一路做一路畀分，用平板電腦入面又計一次，10變8變5再變冠軍，冇理由推到咁，大會計師行唔使做到咁啫。」