大地翻騰，天府遭殃，四川大地震傷亡人數不斷上升，舉國哀慟，立法會噚日開會時，主席范太話應議員建議，全體議員起立為死難者默哀一分鐘，禮成議員就座，長毛卻鶴立雞群唔坐低。
原來長毛會前要求身兼人大常委嘅范太做代表，建議港府下半旗三日哀悼死難者，佢心急想知道范太有冇咁做，所以企起身追問范太。范太近日可能睇得太多災難新聞，見到長毛又搞搞震心都煩晒，即時扯火大鬧，叫長毛唔好喺默哀時間玩嘢，破壞莊嚴氣氛，又表示已代佢提出要求。

長毛好似唔滿意范太答覆，堅持企起身，范太好不屑咁大「哼」一聲，直指長毛唔遵守佢裁決，指令長毛離開，長毛不待實Q埋身，自行執嘢憤然離場。事後長毛批評范太濫用主席權力，范太透過發言人稱，本來準備好回應長毛建議，由於佢經常唔守規矩，不能姑息，所以要下離場令。
長毛透過范太要求港府下半旗，不過港府未有回應，其實根據《區旗及區徽條例》，發生特別重大傷亡嘅不幸事件，或者嚴重自然災害造成重大傷亡時，如特首認為適宜，可以下半旗致哀；而按《國旗及國徽條例》，特首獲中央政府知會有重大意外、天災，可以按中央指示將國旗下半旗致哀。
至於喺乜嘢情況下先可以下半旗，根據內地《國旗法》，要由國務院拍板。據了解，港府冇向中央提出下半旗，事關如果煲呔自把自為將區旗下半旗，國旗則如常高掛，情景就好尷尬，為免「添煩添亂」，總之一切聽中央指示。
其實唔止長毛要求下半旗，國內唔少人都有相同要求，好多人認為中央政府應該宣佈下半旗悼念死難者，以國家嘅尊嚴送別死者，有人更建議下半旗期間，全國暫停所有聲色犬馬娛樂活動，讓死者喺莊嚴肅穆氣氛中安息。
雖然網上對下半旗問題討論得好熱烈，但領導人目前忙於救災，可能暫時唔得閒思考呢個問題，所以未有回應。官方對下半旗議而不決，八方為表達對死難者哀悼，今日先下半旗致哀，同時呼籲大家繼續協助災民，佢哋實在好需要大家援手。
mailto:[email protected]