由於司馬文係城市規劃專家,加上做過共建維港委員會多年,成功爭取保育地方多不勝數,地圖上嘅香港島,好快就俾大堆八爪魚「」咗。84年已東來、喺香港定居26年嘅司馬文,廣東話仍然半鹹淡,但噚日就好努力講,介紹自己係「荷蘭人」時,搞gag話自己亦係「好男人」,又指薄扶林選區有唔少問題「好難忍」。
鬼佬參選區議會,贏面大家心中有數,司馬文承認廣東話肯定不及對手劉應東,不過薄扶林區選民英文唔差,佢覺得問題不大。司馬文兩個仔噚日亦有撐老竇,司馬文透露,其實佢個香港老婆都想嚟撐場,但由於要湊今年6月4日出世嘅細女司馬文懿,所以只能精神上支持。